مدعوم من 
وحشتينى يا أمي
كلمات – وفاء زايد:
وحشتينى يا أمى ياساكنة جوه قلبى وكياني
ياللى حُبى ليكى فوق الخيال وبيجرى فى دمى وشريانى
ياعطر الزهور ياشمس الورود
ياللى ربنا ذكرك ووصى عليكى فى كتابه
أوصف إزاى إحساسى بيكى لما كنتى جنبى
عارفة كنت بأحس بإيه؟
بالأمان بالحنان بالطيبة اللى فى عنيكى
بالدعوة اللى كانت فاتحة طريق مسدود قدامى
مش قلتى يامًا مش هسيبك وهافضل جنبك
طاب ليه بعدى عنى وماوفتيش وعدك
وبسأل مين هاشوفنى مهموم ويواسينى
مين هيمسح دموعى ويراضينى
أصلك إنتى نبض قلبى
أصلك إنتى كل أملى
أصلك إنتى كل حاجة
وأنا أصلا حتة منك
طول عمرك شايله همى
وقت فرحى شايله عنى
وحكتيلى يامًاكلام كتير عن الدنيا ال احنا فيها
يابنتى بكرة مش هابقى معاكى بس وقتها محستش بيها
كنت بتقولى إنك فرحانة لما بكون فرحانة
متعرفيش إن بُعدك عنى كان نهايتى وبجد تعبانة
بس اللى مصبرنى دلوقتى إنى شايفاكى فى الجنة ونعيمها
وزى ماقالوا إن الأم الجنة تحت أقدامها