مدعوم من 
إنتى قَدَرى
بقلم – قدرى نوار:
لما يندهنى القمر
ترقص عيونى السهرانين
والتقيكى ضحكة طالة من السما
وسط ليل بيفوت حزين
بانسي نفسي
وانسي حتى
إسم عشت بيه سنين
شيء وحيد ما انساهوش
هو إن بدون وجودك فى الحياة
ببقى مش حاسس خطاوى العمر
ماشية بيا فين
ما انتى حبك يا حبيبتى
هو أغلى شيء قابلته ف دنيتى
واشتياقى لأى شيء فى الوجود
يبقى أيه جنب شوق
عمرى كله لضى همسك
اللى بيرجّع بريق الحلم تانى
بعد غيبة للعينين
وابتسامتك لما بتطول الليالى
يوم ما بٍتُّوه منى الدروب
والغيوم بتخبي عنى خلف منها
شمس تانية
شمس باهتة جنب شمسك
تبقى هى نور طريقى وبوصلتى
اللى بتحدد لروحى ونبض قلبي
المسار حدوده فين
فين حقيقة الاتجاه
وسط دوامة حياه
توهتنى ودوبتنى م الحنين
وانتى قدرى وقسمتى
من بداية درب عمرى لمنتهاه
وانتى فرضى وسُنِّتى
وقبلتى وقت الصلاة
وانتى منحة م الإله
وانتى فعلاً أحلى حاجة
لأ حقيقى كل حاجة فى كلمتين
قدرى نوار
التعليقات مغلقة.