بحث عن موضوع السياحة متكامل لطلاب الصف الخامس الإبتدائي بالعناصر والمقدمة والمراجع

أحبابي طلاب وطالبات الصف الخامس الابتدائي
هنعمل مع بعض البحث المطلوب منكم
المهم الموضوعات إللى عندكم زى تالته ورابعة بالضبط
سامع واحد بيقولى حلو أعمل أنا وأخويا بحث واحد
اوعى تعمل كده لأن عناوين الموضوع واحدة بس العناصر إللى مطلوبة فى كل صف غير إللى فى الصف التانى خالص
المهم ما اطولش عليكم المواضيع المطلوبة منكم
١- السياحة ٢ – الصحة ٣- الطاقة ٤- الماء
هتختار موضوع واحد بس طيب نقول تانى وااااحد بس

ونعمل فيه البحث بتاعنا
أنا مثلاً هختار موضوع   (السياحة)
سامع واحدة بتقول طب أشمعنى السياحة  يا مستر أكيد السياحة دى قريبتك .
لا يا ست الحاجة عشان كتاب الدراسات بتاعك فيه صور عن السياحة بالكوم فمش هنتعب فى جمع الصور بتاعت البحث شوفت بقى ظلمتنى إزاى 

تدخل على الرابط ده

https://studea.emis.gov.eg
نجيب منه الكود أو الرقم التعريفى بس كده خلص واجبك النهاردة
بكرة بقى هندور على موضوع السياحة فى كتاب الدراسات بتاع المدرسة لو لقيت صور عن السياحة قصها من الكتاب واحتفظ بيها عشان هنعوزها واحنا شغالين
بعد كده أدخل على الرابط ده:
https://www.ekb.eg/ar/home
وده رابط المكتبة الرقمية
طب يعنى ايه مكتبةرقمية اقولك انا يا سيدى دى زى اوضه كببيييرة مليانه كتب. وفيديوهات .وأفلام. بدل مرمطة كتب المدرسة وسلاح التلميذ. أدخل جواها ودوس ذاكر – الدراسات – الصف الخامس وأكتب فى مؤشرالبحث. السياحة واتفرج على هيطلعلك وأكتب فى كراسة قديمة كده الأفكار الرئيسية والنسب والأرقام إللى سمعتها عشان هنعوزها وإحنا شغالين
بعدين نبدأ نشتغل بقى فى الورق إللى طبعناه فى السيبر

عنوان عن السياحة

أول حاجة نختار عنوان مناسب عن السياحة ويكون يشد اللى بيصحح البحث… زى مثلاً..
-السياحة أنواعها ومقوماتها
-السياحة ومستوى المعيشة
-السياحة عماد الإقتصاد ……… وهكذا
بعد ما نكتب العنوان
ننزل نكتب الكود أو الرقم التعريفى إللى جبناه فى الاول
ويستحسن ما تعملش البحث لوحدك شوف أربعة تانى من زمايلك فى سنة خامسة وفى نفس المدرسة مش من مدرسة تانى وتعملوه مع بعض. كده خلصنا من الورقة الأولى ندخل على الورقة الثانية عناصر البحث نكتب فيها الكلام ده
عناصر البحث:-
١:- أنواع السياحة في مصر.
٢:- مقومات السياحة في مصر.
٣:- تخيل إنك مسؤول عن أحد الأماكن التي تقدم الخدمات السياحيه قم بحساب عدد الزائرين صيفا وشتاء والمقارنة بينهما موضحا سبب الزيادة والنقصان.
٤:- صمم ملصقات إرشادية مستخدما الاشكال الهندسية التي درستها باللغة العربية واحد اللغات الأجنبية.

مقدمة البحث

بعدين نمسك الورقة الثالثة ونكتب فيها المقدمة
السياحه هي السفر لأغراض مختلفه فهناك سياحة ثقافية ، ترفيهية، علاجية،دينية كما توجد السياحه البيئية والرياضية وسياحة المهرجانات والمؤتمرات بالإضافة الي سياحة السفاري
ومصر بلد سياحي تمتاز بالعديد من الأماكن السياحية ، حيث تمتلك مصر اكثر من ثلثى آثار العالم حيث يوجد بها آثار فرعونية ويونانية ورومانية وقبطية واسلامية كما أنها تتمتع بالمناظر الخلابة ومنحها الله جوا معتدلا صيفا ودافئ شتاء ووهبها موقعا متميزا وأنعم عليها بالأمن والأمان قال تعالي:- “ادخلوا مصر إن شاء الله امنين”.

عناصر الموضوع

طيب كده خلصنا المقدمة نبدأ  فى جسم البحث إللى هى العناصر إللى كتبناها فى الاول بس المره دى هنجاوب على عنصر عنصر بالتفصيل.

العنصر الأول

أنواع السياحة في مصر .

تتعدد أنواع السياحة في مصر فهناك سياحة ثقافية، وسياحة ترفيهية ، وسياحه علاجية ، وسياحة دينية وتتمثل في زيارة المساجد والكنائس والاديرة مثل:-
الدير المحرق ومسجد سيدى جلال الدين السيوطى بأسيوط كما توجد في مصر سياحة رياضية وسياحة المهرجانات والمؤتمرات بالاضافه الي السياحة البيئية وزيارة المحميات الطبيعية مثل :-
محمية رأس محمد ، بالإضافة الي سياحة السفاري حيث يتجول السائحون في المناطق الصحراوية والجبلية.
بس كده يا سيدى وحط صور عن السياحة
كده خلصنا العنصر الأول يلا بقى نجيب الورقة بتاعت العنصر الثانى.

العنصر الثانى

مقومات السياحة في مصر.

تنقسم مقومات السياحة في مصر الي مقومات بشرية ومقومات طبيعية
اولا:- المقومات الطبيعية مثل:-
١- الموقع الجغرافي
٢- المناخ
٣- المناظر الخلابة
ثانيا:- المقومات البشرية :-
١:- الآثار التاريخية .
٢:- وسائل النقل والاتصال.
٣:- الفنادق والقري السياحية.
٤:- الأمن والأمان.
٥:- طبيعه الشعب المصري الذي يرحب بالضيوف
بس كده وحط اى صورتين
المصادر :منصة edmodo
يلا بقى نجيب الورقة إللى مكتوب فيها العنصر الثالث.

العنصر الثالث

تخيل أنك مسئول عن أحد الأماكن التي تقدم الخدمات السياحية قم بحساب عدد الزائرين صيفا وشتاء والمقارنة بينهما موضحاً سبب الزيادة والنقصان؟؟
اسمي تيمور واعمل موظف  بأحد الفنادق في مدينة الغردقة لاحظت أن عدد السائحين الذين أقاموا في الفندق في شهور الصيف (يونيه ويوليه واغسطس ) بلغ ٥٦٠٠ زائر وفي شهور الشتاء (ديسمبر و يناير وفبراير)٩٨٠٠ زائر والملاحظ أن عدد السائحين في الشتاء يزيد عن عددهم في الصيف ويرجع ذلك الي ان السياح يأتون إلي مصر شتاء للهروب من البرودة الشديدة والجليد في اوروبا
كده تمام بس متنساش الصور
يلا بقى نجيب الورقة إللى مكتوب فيها العنصر الرابع وده آخر عنصر فى جسم البحث.

العنصر الرابع

صمم ملصقات إرشادية مستخدما الاشكال الهندسية التي درستها باللغه العربية واحد اللغات الأجنبية .
طيب إيه الأشكال الهندسية إللى درسناها السنه دى
كان عندنا المستطيل والمربع والمعين ومتوازى الأضلاع والدائرة. حلو خالص تعالى فى الورقة إللى مكتوب فيها العنصر الرابع وإرسم ٩ أشكال من دول بس كبرهم عشان هنكتب جواهم . طب هنكتب إيه . أكتب الكلام ده
١-اهلاً بكم في وطنكم الثاني مصر.
٢- نتمنى لكم إقامة سعيدة.
٣- إبتسم أنت في مصر.
٤- مصر بلد الأهرامات.
1- welcome to Egypt your second country.
2- smile you are in Egypt.
3- Egypt is the country of Pyramids.
4-we hope you good stay .
5:- Sharm Elshekh is the city of peace.

كده خلصنا من جسم البحث يلا هات الورقة اللى بعد كده يلا شوف مكتوب عليها إيه أيوه الله ينور عليك هى دى نتائج البحث يعنى إيه إللى إستنتجته من دراستك للموضوع ده يلا بقى نكتبهم.

نتائج البحث

١- مصر بلد سياحي عظيم.
٢- السياحة أنواع كثيره.
٣- تمتلك مصر ٢/٣ من آثار العالم.
٤- تتميز مصر بموقع متميز.
٥- السياحة ترفع اسم مصر عاليا.
٦- السياحة توفر فرص العمل.
٧- السياحة تزيد الدخل القومي.
٨- آثار مصر متنوعة.
تمام كده خلصنا النتائج هات الورقة إللى بعد كده
أيوه هى دى إللى مكتوب فيها الملاحظات.

الملاحظات

١- ضروره الاهتمام بالمناطق السياحية.
٢-التوعية بحسن استقبال السائحين.
٣- الاهتمام بوسائل الاتصال والنقل
٤:- التوسع في إنشاء الفنادق والقري السياحيه.
كده خلصنا الورقة دى فاضل كام ورقة مطبوعة معاك ورقة واحدة

أحمدك يا رب
آخر حاجة المصادر إللى جبنا منها كل المعلومات إللى فاتت

مصادر البحث

١- كتاب الدراسات من ص…. إلى ص …. وحدة السياحة فى مصر
٢- كتاب الدراسات الاجتماعيه -وحده الأنشطة الاقتصاديه.
٣- المكتبة الرقمية .
٤- منصة edmodo.
٥- دار نهضة مصر .
٦- موقع You tube.
٧- الصور: محرك البحث Google – كتب المدرسة.
بس كده خلصنا. ايوة تمام طب اعمل ايه بعد كده.
شيل الورق ده كله لغاية يوم ٤/١٥ وأنا بمشيئة الله هعلمك إزاى تسلمه وترفعه على المنصة كل اللي تعمله دوس بس علي الرابط ده

https://misralbalad.com/egypt-news/187201/ ‎
وكل سنه وانت طيب و نشوفك السنه الجايه فى الصف السادس

إن شاء الله