حازم إمام يفتح قلبه عبر أون سبورت: فيريرا يصل القاهرة.. ولجنة التخطيط أصبحت من الماضي

كتب : امير نزيه

 

أدلى نجم الزمالك السابق، الكابتن حازم إمام، بتصريحات مهمة عبر إذاعة “أون سبورت إف إم”، كشف خلالها عن آخر التطورات داخل نادي الزمالك، وخاصة فيما يخص الجهاز الفني الجديد واللجنة الفنية السابقة.

 

وقال إمام:

 “شوفت بوست رائع من الكابتن أيمن الرمادي، كان فيه احترام كبير للزمالك وكأنه واحد من أبناء النادي، وأكد أنه مش هيشتكي علشان مستحقاته.. بصراحة كلامه محترم جداً وربنا يوفقه.”

 

كما تحدث عن المدير الفني الجديد قائلاً:

 “النهاردة المدرب الجديد للزمالك، يانيك فيريرا، وصل القاهرة، وأعتقد أنه هيتم تقديمه النهاردة أو بكره على أقصى تقدير.. كل التوفيق ليه وللفريق.”

 

 “يانيك مدرب صغير في السن، وعنده خبرات في الدوري البلجيكي والسعودي، ودي ميزة لأنه عارف طبيعة المنطقة العربية، والطاقم الفني بالكامل هيتقاضى حوالي 50 ألف دولار.”

 

وبخصوص لجنة التخطيط، قال حازم إمام:

 “اللجنة انتهى دورها تمامًا، ومفيش حاجة اسمها لجنة تخطيط دلوقتي، والكلام ده قلناه من أول ما تم تعيين مدير رياضي جديد، بقينا مش موجودين فعليًا.”

 

وأضاف:

 “في ناس بتحصرني في دور عضو لجنة التخطيط، وكأني بتكلم باسم النادي من جواه، وده مش حقيقي.. إحنا خلاص مش في الصورة لا أنا، ولا الأستاذ عمرو الجنايني، ولا ميدو اللي أعلن انسحابه كمان.”

 

 “كل التوفيق للمجلس الحالي، ولكابتن حسين لبيب، والكابتن جون إدوارد المسؤول حاليًا عن كل الملفات، هو اللي بيقود الأمور بالكامل.”

 

 “في ناس بتطلب مني أكلم في صفقات لاعبين، والله ما نعرف حاجة، ومندخلناش في أي تفاصيل.. حتى اسم المدرب الجديد معرفتوش غير لما أعلنوه رسميًا.”

 

يُذكر أن يانيك فيريرا، المدرب البلجيكي، يستعد لقيادة الفريق الأول لكرة القدم بنادي الزمالك، خلفًا للفترة الماضية، وسط تطلعات جماهيرية بعودة الفريق للمنافسة القوية على البطولات المحلية والقارية.