لكل ست بيت شاطرة اسمعي منى نكهات جديدة في مطبخك

كتبت رشا الشريف

كل ست بيت شاطرة اسمعى منى نكهات جديدة في مطبخك

  اول تكه في البطاطا :

انا اما بشوي البطاطا في الفرن بخرمها كتيير بالشوكة علشان بتنزل العسل اللي جواها، وجربي كده اخرمي واحدة وواحدة لا وهتشوفي الفرق في الطعام، اللي بتكون مخرمة اكييد طعمها هيكون احلى

– الفانيليا :

يا سلام عليها لو ضيفناها على اي حاجة بتخليها خيال

على العصاير خصوصا لو اي حاجة فيها لبنب، بلح _ جوافة _ موز اي عصير هتحسي طعمه زي اللي بتشربيه في احلى الكافيهات، وعلى البشاميل، وعلى عجينة البيتزا طعمها بتكون ولا بيتزا هت، وممكن نضيفها على الفيشار كمان مش بقولكوا الفانيليا دي حاجة تحفة

– تالت تكه :

اما بسيح السمن بضيفله ورق لورى وحبهانب، يديله ريحة حلوة اوي ويتخزن لمدة سنة بنفس الريحة

 

– رابع تكه :

صلصة الكشري اما بعملها وتخلص بعملها طشة توومة بكزبرة كتيير بتفرق في طعم الكشري كله، وده سر من اسرار كشري ابو طارق

 

– خامس تكه :

اما تشتري اللبن وتحسي او تشكي انه ممكن يكون رايب

او هيروب وهو بيغلي اول ماتحطيه عالنار ضيفيله معلقة بيكنج بودر كبيرة وقلبيها فيها، ان شاء الله مش هيروب خالص

 

– سادس تكه :

حفظ الخضروات الورقية زي الشبت والبقدونس والجرجير انا بغسلهم وانشفهم في فوطة نظيفة بس مش يكون فيه نقطة مية واحدة والفها في ورق ابيض نظيف مش كيس علشان الكيس بيعمل بخار مية وينزل عالخضار يسوده ويبوظه

 

– سابع تكه بواقي الكيك :

لو عندي بواقي كيك بفتته واعمله تورتة جيلي

بعمل في قالب جيلي واما يجمد بفتت عليه نص الكيك وبعدها طبقة كريم شانتي وبعد كده باقي فتافيت الكيك واصب باقي الجيلي واسيبه يبرد في التلاجة تانى

 

– تامن تكه :

الملوخية انا بضيفلها كزبرة خضرا وتتخرط معاها بتكون لذيذة اوي

 

– تاسع تكه :

اما تخزني خضار او فاكهة في الفريزر ما تنسيش تخرجي الهوا اللي في الكيس علشان الحاجة اللي جوا ما تسودش وتفضل محتفظة بلونها

 

– تكه رقم 10 :

لو عاوزة تعملي اكلة شكلها شيك وموفرة في نفس الوقت ممكن تعملي الشيش طاووق بس بدل الفراخ تحطي بطاطس مكعبات وطعمها يجنن وشكلها جمييل

 

– تكه 11 :

لو عندك بواقي رز ممكن تضيفي عليه بيضة وبهارات وتعمليها في الكبة تكوريها زي الكبيبة وتفتحيها من النص وتحشيها جبنة بزيتون وفلفل وتقليها في زيت

 

– التكه 12 :

لو السويسرول اتكسر او اتفتت منك وانتي بتلفيه اعمليه تورتة مستطيلة اقسميها اتنين بالطول واعمليها زي ما بتعملي التورتة عادي احشيها كريم شانتي من النص وضيفي النص التاني وزوقيها على زوقك انا عملت معايا كده وقلبتها تورتة

 

– تكه 13 :

لو هتعملي رز بالخلطة ومكسلة تعملي الكراميل انا بضيفله معلقتين عسل اسود طعمه بيكون حلو اوي بجد

 

– آآآخر تكه :

اما بعمل شوربة لسان عصفور بحمرها واسيبها شوية علشان لو ضيفت عليها الشوربة على طول لسان العصفور بشقق كأنه مكسر