“منين نجيب مستلزمات المدرسة باسعار مناسبة؟” .. “أمهات مصر” يشاركن تجاربهن

 أحمد مصطفى:

“جبتوا مستلزمات المدرسة ولا لسه؟ وبتجيبوا منين تكون أسعارها مناسبة؟ خلونا نفيد بعض”، بهذه الكلمات وجهت عبير أحمد، مؤسس اتحاد أمهات مصر للنهوض بالتعليم وائتلاف أولياء الأمور، رسالة لمتابعة استعداد أولياء الأمور للعام الدراسي الجديد.

وتفاعل العشرات من أولياء الأمور على جروب اتحاد أمهات مصر للنهوض بالتعليم وائتلاف أولياء الأمور، حيث قالت ولية أمر: “اشترينا للأسف، والأسعار مبالغ فيها جدًا، الكتب الخارجية غالية جدًا، وأسعار المستلزمات زي الاسكتشات والكشاكيل والأقلام مرتفعة، الواحد محتاج قرض من البنك والله، ربنا يعينّا، ولسه كمان السبلايز والشنط، أقل شنطة بـ600 جنيه ومش كويسة، والشنطة الحلوة معدية الألف جنيه.”

وأوضحت ولي أمر أخرى: “في معارض أهلاً مدارس اللي بتتعمل في أرض المعارض بمدينة نصر، بيكون فيها تخفيضات على كل الأدوات المدرسية، وكمان مكتبات الفجالة فيها كل حاجة بأسعار أقل وفي متناول اليد، وفي أماكن تانية زي الأزهر والغورية للي عاوز أسعار مخفضة وأشكال وألوان متنوعة.”

وأضافت ولي أمر : “اشترينا الكتب الخارجية بس، عشان الدروس بدأت، ولسه باقي المستلزمات، ربنا يقوينا.”، وعلّقت أخرى: “احنا بنجيب من المكتبات، لكن أسعارهم عالية جدًا، الشنط بالذات أسعارها مبالغ فيها، لكن الفجالة فيها كل الاختيارات اللي ممكن أي حد يلاقي منها اللي يناسبه.”

وتابعت ولي أمر أخرى: “مش لازم نجيب كل الأدوات جديدة، ممكن نكتفي باللي محتاجينه فعلًا، الشنط ممكن نستخدمها تاني، والمقالم ممكن نغسلها ونستعملها، نشتري بس الأقلام والكشاكيل الضرورية وكمان نشوف المكتبات اللي بتعمل تخفيضات، وياريت المدارس تراعي ظروفنا ومتطلبش أدوات كتير زيادة عن اللازم.”