مدعوم من 
كيرلس مش مجرد فنان .. كل خط في لوحته حكاية كفاح
كتبت : دعاء مصطفي
وأنا بكتب السطور دي .. كنت شايفة قدامي مش مجرد شاب بيرسم .. لكن روح مليانة إصرار ومثابرة وطموح مايعرفش المستحيل.
كيرلس عادل جرجس 26 سنة ، من إسكندرية ، فنان بالفطرة وعلم نفسه بنفسه من غير ما يدخل كورسات أو ياخد تدريب ، ورغم كده وصل لمستوى يخلي فنانين كبار يردوا عليه ويشيدوا بشغله ، ده غير إنه لما سأل “ChatGPT عن فنه كتب عنه مقال وفرح كأنه كسب جايزة نوبل .
حكى لي كيرلس إنه بدأ برسم بسيط في كراسات المدرسة وكان دايماً سابق زمايله بخطوة والمدرسين لاحظوا موهبته وشجعوه.
لكن المشوار مكنش سهل واتعلم بالمحاولة والخطأ ، وكانت وراه أم عظيمة مؤمنة بيه وبموهبته ووفرتله كل الأدوات وكل الدعم .
حبه لخامة الفحم خلاه يبرع في البورتريه الواقعي، وكان بيرسم علشان يعبر عن مشاعره وقت الفرح والحزن والورقة كانت دايماً صديقته .
قد يهمك ايضاً:
ولما بعت بورتريه للفنان محمد صبحي على واتساب، ورد عليه إنه أعجب بالشغل ودعاله بالتوفيق، حس إن تعبه مراحش هدر ، وكمان نال إعجاب الدكتور مجدي يعقوب ، والفنانين أحمد أمين وسلمى أبو ضيف.
والأجمل إنه حصل على المركز الأول في مسابقة بإشراف وزارة الثقافة والبيئة والري، عن لوحته اللي جسد فيها السد العالي بجانب تكريمات متعددة عن أعماله في الأيقونات القبطية .
كيرلس قالي إنه زمان كان بيقع في فخ المقارنة مع المحترفين وكان بيسمع كلام يوجع القلب زي “رسمك تافه ومفيهوش فن”، لكن كل ده حوله لدافع يخليه يثبت العكس ويثبت نفسه لنفسه قبل أي حد .
كيرلس بيحلم بمعرض دولي يحمل اسمه ، وبمجلة كاريكاتيرية تناقش المجتمع بأسلوب ساخر ، وورش تدريبية يعلم فيها الأطفال والشباب اللي بيحبوا الفن ولسه مش عارفين يبدأوا منين .
الحقيقة.. كيرلس مش مجرد فنان، كيرلس درس حقيقي في الإصرار .
