قفزة مفاجئة في أسعار الفراخ البيضه.. الكيلو يرتفع 17 جنيهاً والبلدي “في سكة تانية”!

خالد علم

عد حالة من الهدوء والاستقرار شهدها سوق الدواجن الأيام اللي فاتت، تفاجأ المستهلكون النهاردة بـ “نطة” قوية في الأسعار قلبت الموازين، وخلت التساؤلات تزيد: إيه اللي بيحصل؟ وليه الزيادة وصلت لـ 17 جنيه في الكيلو الواحد مرة واحدة؟

بورصة الأسعار اليوم: تغيرت الخريطة السعرية بشكل متسارع، وده رصدناه في الأرقام التالية:

• الفراخ البيضاء: بعد ما كانت بـ 58 جنيه في المزرعة من أيام، وصلت النهاردة لـ 75 جنيه، وبتتباع للمستهلك بـ 86 جنيه.

• الفراخ الساسو (الحمراء): كسرت حاجز الـ 100 جنيه للمستهلك.

• الفراخ البلدي: دخلت في منطقة تانية خالص ووصل الكيلو لـ 130 جنيه.

• مشتقات الدواجن: كيلو البانيه لامس الـ 200 جنيه، وكرتونة البيض البلدي وصلت لـ 150 جنيه.

ليه ده بيحصل وهل السبب الأعلاف؟ الحقيقة المرة هي إن الزيادة المرة دي مش بسبب نقص الأعلاف ولا أزمة إنتاج، لأن مصر عندها فائض وبنصدر كمان. السر الحقيقي وراء القفزة دي يتلخص في “زحمة المواسم”.

مع اقتراب شهر رمضان المبارك وتداخل المواسم والأعياد، زاد الطلب من المواطنين لتخزين احتياجاتهم، والضغط الكبير ده خلى الأسعار تخرج عن السيطرة وتزيد بالشكل ده في وقت قياسي. السوق حالياً بيتحكم فيه “العرض والطلب اللحظي” أكتر من تكلفة الإنتاج الحقيقية.