مدعوم من 
طفل تايه وصل الستين
شعر : رجب شداد
يا أولاد الحلال
طفل تاه
لسه فينا
طفل تايه
بيصرخ من سكات
روحه شاردة في ألف حاجة
طفل متعلق بكام حكاية
والحكاية
ياسادة سرالسعادة
الحكاية حكاية
الأصول
تربية الأصول
أنت مين
حامل دساتير
حاسب لما تقول
حاسب من نظرة العين
مشيتك..بسمتك..سلامك…سكتك
سكاتك
طفل معمول راجل صغنن
…….
حلمه كان
حلم طفل
حصان وفارس من طين
وابور طين
بقرة ومعزة وجاموسة
من الطين
ومخطط على الأرض
ملكه قيراطين طين
حلم باسط دراعه
على شط الترعة
تحت التوتة
والصفصافة العجوزة
الحكاية حكاية
العصاري لما يجري يتنطط
على وابور الطحين
وبعده على السرايا
والدوار
ومكان العمدة
إللي كان
يلعب تريك
وشنك بنك
وكرة شراب
وسبع شقفات
ونطير فوق أكياس القطن
عند الكنيسة
لساه طفل تايه
……..
لسه فيه بكا
قد يهمك ايضاً:
طفل تايه
مهما يتغير الزمان
ومهما تتبدل الحاجات
نفسي يرجع عمري تاني
نفسي يرجع إللي فات
وابقى طفل فـي إيده ورقة
بيرسم فيها خربشات
محبوبة
وحمامة طايرة للغية
شجرة تفاح
أو حتى مزهرية
غراب بيدفن
أخوه
لأن الكل تاه
خربشات وورقة
……
طفل
كل همومه لعبة
وكان من المغرب يبات
يرسموا له الدنيا جنة
وست الحسن
وصاحبتها البنات
ويحكوا ليه ذكريات
على الحضير فوق السطوح
وعلى المصطبة
متغطي بحمل الصوف
والعم والخال
حوالين راكية النار
بيحكوا حكاوي زمان
في ليل الشتا
الطويل
طفل لما يتعب
علاجه كمادات وأسبرينة
طفل تايه
وصل الستين
وعايش لساه
على الذكريات
وهن العظم
واشتعل الشيب
لكن لسه الطفل
جواه
طفل تاه
اللي يلقاه يجيبوا
على العنوان
نفس المكان
………
يا أولاد الحلال
طفل تاه
من زمن كان.
التعليقات مغلقة.