طريقة لازانيا باللحم المفروم والبشاميل “وصفات رمضان “

المقادير:
باكيت لازانيا 400 جرام
750 جرام لحمه مفرومه
2 بصله كبيره مفرومه ناعم
فصين ثوم مفرومين ناعم
3 معالق كبار زبده.
معلقه كبيره بقدونس مفروم
معلقه كبيره زعتر مجفف
ملح وفلفل أسود حسب الرغبه
نصف كيلو طماطم مقشره ومفرومه
معلقتين كبار معجون طماطم
مقادير البشاميل:
معلقتين كبار زبده
ملح وفلفل اسود حسب الرغبه
رشة جوزة الطيب
4 معالق كبار دقيق
نصف كوب جبنه موتزاريلا
2 كوب حليب
في حله على النار نضيف الزبده وننزل البصل ونقلبه كويس لحد مايدبل
نضيف اللحم المفروم والثوم للبصل ونقلب لحد ما اللحمه تستوي
نضيف البقدونس والزعتر المجفف ثم الطماطم المفرومه ونقلب كويس ونتبل بالملح والفلفل الأسود مع التقليب
نغطي الحله ونسيبها على نار متوسطه شويه لحد ما المكونات تتجانس ونرفعها عن النار
لعمل البشاميل:
نضيف الدقيق إلى الزبده المذابه في حله على النار ونقلب لمدة دقيقتين
نضيف الحليب السائل مع التقليب المستمر لحد ما القوام يتقل
نضيف الملح والفلفل الاسود، ورشة جوزة الطيب ونضيف الجبنه الموزاريلا مع الاستمرار في التقليب وبعدين نرفعه عن النار ونسيبه على جنب
نسلق اللازانيا نصف سوا في ماء مملح متضاف معاه معلقتين زيت وبعدين نطلعها نحطها في مياه بارده بمكعبات تلج عشان اللازانيا ماتلزقش مع بعضها
ملحوظه: سلق اللازانيا بيكون شريحه او اتنين بالكتير ونستخدم معلقه خشب للتقليب، وفيه أنواع لازانيا مش بتحتاج سلق وبنستعملها على طول
نجيب صينيه بايركس ندهنها بشاميل بسيط وفوقها طبقة من اللازانيا ونضيف طبقه من اللحمه المفرومه. نكرر طبقة بشاميل على اللحمه ونغطيها بطبقة لازانيا وننهي الازانيا بطبقة بشاميل ونضيف الجبنه الموتزاريلا على الوش
ندخل الصينيه فرن ساخن على درجة حراره 200 لمدة 20 دقيقه لحد ما اللون يبقا ذهبي