حلول سهلة وسريعة للشعر الخفيف

الشعر الخفيف مشكلة بيعاني منها كتير من البنات وبنقعد نجرب حاجات كتير عشان نتقل شعرنا, والمشكلة التانية اللي بتقابل البنات اللي شعرهم خفيف انهم مش بيعرفوا ايه قصة الشعر اللي ممكن تناسبهم عشان الشعر يطلع اتقل وشكله حلو, النهاردة احنا جايبين لكل بنات حوا اللي بيعانوا من مشكلة الشعر الخفيف نصايح وحيل تخلي شعرك اتقل, وكمان انسب قصات الشعر المناسبة للشعر الخفيف.

تعالوا نعرف مع بعض 16 نصيحة وحيلة للبنات اللي شعرهم خفيف:

1- تجنبي تشابك الشعر:

لازم نحرص اننا نسلك شعرنا اول باول عشان نتجنب التشابك لانه لو سبتيه لما هتيجي تسرحيه هيقع وطبعا هيخف وكمان هيتقطع منك ويبوظ وانتي بتسلكيه

2- سرحي شعرك قبل ما تغسليه:

قبل ما تغسلي شعرك سرحيه عشان تفكي التشابك بتاعه, لان الشعر وهو ناشف بيكون اقوى من وهو مبلول

3- استخدمي نوع شامبو وبلسم كويس ومناسب لشعرك

4- متحطيش البلسم على فروة الراس:

طبعا زي ما قولنا البلسم مهم جدا للشعر ولكن المفروض انه ميتحطش على فروة الراس لانه ممكن يسد المسام بتاعتها

5- استخدمي البلسم الخاص بالشعر الخفيف للتشابك الصعب

6- متسرحيش شعرك وهو مبلول:

زي ما قولنا قبل كده بردوا ان الشعر وهو مبلول بيكون ضعيف عشان كده الافضل انك تتجنبي انك تسرحيه وهو مبلول, الا في حالة واحدة لو متوفر عندك مشط خشب سنانة واسعة ده النوع الوحيد اللي ممكن تسرحي بيه الشعر وهو مبلول

7- لمي شعرك وانتي نايمة

عشان تحافظي على شعرك وانتي نايمة سرحيه واعمليه ضفيرة وتكون مش محكومة اوي يعني خليها سايبة شوية عشان الشعر يتنفس, او اعمليه ديل حصان منخفض

8- نامي على مخدة ساتان او حرير

لو بتنامي على مخدة قطن استبدليها بمخدة ساتان او حرير لانها افضل للشعر, لان القطن بيسبب تشابك الشعر وكمان بيسبب جفافه وتقصف الاطراف

9- استخدمي الشامبو الجاف:

الشعر الخفيف بيزيت وبيلزق بسرعة اكتر من الشعر التقيل وعشان متغسليش شعرك كتير انسب حل ليكي هو الشامبو الجاف

10- سرحي شعرك على قدام ونشفيه بالسيشوار:

في حيلة سهلة وسريعة ممكن تعمليها عشان تدي الشعر حجم اكبر, سرحي شعرك كويس الاول عشان ميبقاش فيه تشابك وبعدين اقلبي شعرك كله لقدام وركزي عليه السيشوار الطريقة دي هتدي شعرك احجم اكبر.

11- استخدمي سبراي او موس للشعر

12- استخدمي سبراي ملح البحر:

من الحاجات اللي بتدي حجم اكبر للشعر مرتين اكتر, سبراي ملح البحر موجود في المحلات اللي بتبيع منتجات تصفيف الشعر

13- ادهنيه بكريم تصفيف الشعر قبل السيشوار

14- تجعيد الشعر:

من الحاجات اللي بتدي حجم كبير للشعر هو طريقة تجعيد الشعر تجعيدات صغيرة ده بيدي حجم اكبر بكتير للشعر, ممكن تجعديه كله, او تسيبي الجزء اللي من قدام ستريت او مفرود وتجعدي باقي الشعر.

15- دلكي فروة الراس:

دلكي فروة الراس لان ده بينشط الدورة الدموية وبيساعد على نمو وكثافة الشعر, كل يوم واظبي على عمل مساج لفروة الراس قبل ما تنامي لمدة خمس دقايق هتفرق مع شعرك اوي.

16- كلي اكل صحي:

التغذية الصحية والسليمة من الحاجات اللي بتأثر على نمو شعرنا ومن اكتر الحاجات اللي بتساعد في نمو الشعر وبتخليه كثيف هو حمض الفوليك, والفيتامينات زي فيتامين A, B, B3, B12, C, E, وH.