تامر حسني يوجه رسالة لـ محمد سامي إنت المخرج الوحيد في تاريخ مصر اللي مفشلش ولا مرة 

كتب – عماد السعدني :

علق الفنان تامر حسني عبر صفحته الشخصية برسالة للمخرج محمد سامي ، قائلًا أوعى تكون عايز تبعد علشان أي إحباط جائز يكون بالفعل في بعض المشاهد اللي الناس إنتقدتها حتى أنا شخصيًا إستغربتها شوية وقُلت جوايا أنك مش محتاج تعملها أصلًا لأن عندك الحقيقي و الأهم بس على رأيك الفنون جنون أحيانًا .

وأضاف تامر حسني أن فكرة مجنونة تنال الإعجاب و فكرة لا تنال إعجاب أحد ، ولكن دا ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مرة ويمكن الحظ محالفكش أوي في عمل ولا أثنين على مدار 14 عام ، ودي حاجة مينفعش الجمهور ينساهالك ، إنت قدمت مسلسل آدم اللي جمع كل المصريين وكل الوطن العربي يتفرجوا عليه زي ماتشات الكورة بسبب أنه أتكلم عن قضية تخص كل الوطن ، وكان بداية لصورة جديدة أول مره كانت بتتقدم في مصر ، و بعدها سبق الإصرار و حكاية حياة ، اللي كانوا نقلة كبيرة في ديكورات الدراما المصريه .

وأشار الفنان تامر حسني أن الأسطورة والبرنس وجعفر العمدة اللي حققوا نجاحات ساحقة و كانوا أعلى نسبة مشاهدات في الدراما بشكل عام ، وتاليهم نعمة الأڤوكاتو و إش إش و سيد الناس ، اللي بردُه كل واحد فيهم يا أعلى مشاهدة يا تاني أعلى مشاهدة .

وقال حسني هزعل منك لو هتمشي مُحبط وأنت أنجح حد ، الشجرة الخضراء الجميلة ساعات بيطلعلها  

ورق أصفر بسيط عادي بيتقص وبتفضل شجرة كبيرة و جميلة ودا التطوير الطبيعي للبني آدم ، واللي بيمر به أي ناجح بيطور وعنده شخصية بدليل مسلسلاتك بيتقال عليها مسلسلات محمد سامي .

مشيرًا للمخرج محمد سامي تركيز الناس معك دليل على حبهم لأعمالك ورغم إن بعضهم بينتقدوها بس متابعينها حرف حرف و نقدهم لك بيبقى على قد حجمك ، وهي دي ضريبة الناجحين الكبار . 

وأختتم المطرب تامر حسني ، سافر و كمل حلمك وأنت منتصر بتاريخك وأوعى تُحبط و أنا عارف إن محمد سامي اللي أكتشفته أنا و قدمته للصناعه و هو عنده 27 سنة لايمكن هيتهز ، ممكن يزعل يومين و يراجع نفسه في مشاهد أنا مبسوط منك أنك بمنتهى الشجاعة الأدبية أعتذرت على تقديمها ، خد راحة شوية وإرجع أقوى من الأول و أنا واثق من اللي هتسافر علشانه أنه قرار هيضيف نقله كبيرة لمشوارك ، وأوعى تخلي الزعل من بعض المشاهد ينسيك أنت قدمت إيه للدراما ، موجهًا للجمهور ياريت قبل ما نقسوا على سامي بهذة الطريقة نفتكر هو أمتعنا سنين قد إيه بمسلسلاته ، وأنا ذكرتها كلها علشان لو حد ناسي أفكره ، وعلشان لو هو محبط يجمد تاني ، ربنا ينور طريقك و ترجع أقوى و أقوى من أي وقت واثق فيك يا حبيبي ، وأنا هفضل أخوك الكبير و في ضهرك إن شاء الله طول العمر يا بطل .