مدعوم من 
الشاعر الكبير محمد الشحات محمد يكتب بالعامية “توبة”
توبة
شعر/ محمد الشحات محمد
ومنبعنا
ومين باعنا
وتحت وفوق.. حياة أو موت
ولمسة شوق.. ببصمة صوت
تشع شعنا
ترجعنا ل دواير شك، توجعنا
كمان ها احلف بحرف النون
ولو قالوا البعيد مجنون
مفيش مانع..
لأن المولد اتشفر
على سبورت اللي بتصفر
بدون إرسال
وكل الدنيا رح تشهد
بأني لوحدي متكفن بتلاجة
وحارة القبر دي واعرة
وشاعرة ب عشرميت حاجة
ومين رح يستلم جثة غريب
عايش،
بكام كلمة، و 200 معنى؟
قد يهمك ايضاً:
ومين فكر؟
حساب الدنيا متهكر
وبس الأدمن “الواحد”
يدوب تنشر..
تلاقي الصفحة مقلوبة
وينشر في الجميع سراق
وكله مصاحب الوراق
لكن طبع الكتاب توبة!
وكله يا صاحبي متفهرس
مصب التوبة منبعنا
ومن شاري لبياعنا
تلاقي الكل متسكر
ومش سكران
دا بس الحلق متسكر
مفيش نكران
لكن حاسب..
دا مهما الشط يتعكر
ومهما العقل شط و تاه
أكيد تتوسط الرحمة..
أمل في الله
أمل في الله