الرئيس السيسي «يغرس» الأمل في احمد بغدودة

كتب – بسيوني الجمل :

أعرب البطل احمد فؤاد بغدودة لاعب المنتخب الوطني للمصارعة الرومانية عن سعادته لدعم الرئيس عبدالفتاح السيسي رئيس الجمهورية له .. ودعوته لحضور منحة تدريبية بالأكاديمية الوطنية للتدريب والتأهيل.

احمد بغدودة من مدينة بيلا محافظة كفرالشيخ وطالب بكلية التربية الرياضية بجامعة كفرالشيخ.

قال فى مقطع فيديو عبر صفحته «الفيس بوك» فى أول ظهور له بعد اختفائه من معسكر المنتخب الوطنى فى تونس 20 مايو الماضى.

قال : السلام عليكم أنا .. أتوجه بالشكر والتقدير والاحترام للرئيس عبد الفتاح السيسى وشعب مصر العظيم .. أحب أشكر حضرتك ياريس على الدعوة الأكاديمية .. بجد أنا أول ما عرفت إن حضرتك بعتلى الدعوة دى كنت مبسوط جدا .. وأنا مش هارب والله ولا حاجة أنا بحب مصر واتولدت فيها وهموت فيها .. ومصر مليانة مواهب كتيرة زيى بس عايزين الدعم وحسن التعامل.

أضاف .. أحب أشكر الشعب المصرى العظيم على دعمه وبجد إنتو أجمل حاجة فى حياتي .. وادعو لى الفترة دي .. وبجد يا سيادة الرئيس أنا بشكر حضرتك على الاهتمام بى وشكرًا يا فندم.

وجه أحمد بغدودة رسالة إلى والده ووالدته وأسرته قائلا : أبويا الحاج فؤاد عامل إيه واحشنى والله أنا آسف يا حاج إنى أخدت القرار ده من غير ما أعرفك لأنى مش بخبى عليك حاجة .. بس والله يا حاج لو أنا قولتلك مكنتش هتوافق .. وأنا آسف يا بابا بس أنا بقيت راجل وعندى إحساس .. أنت تعبت معايا كتير أوى وكنت بتبخل على نفسك وعلى إخواتى عشان أعرف اصرف على نفسى وعلى كليتى وسفرى وڤيتاميناتي .. وأمى حبيبتى وحشتينى والله أنا مش عارف أقولك إيه غير سامحينى يا أمى وسامحينى على إنى قلقتك عليا كتير .. بس والله يا أمى مش بايدى انتى عارفة لو بإيدى كنت عشت تحت رجلك انتى وأبويا وإخواتي حبايبى .. ربنا يخليكم ليا يا رب وأشوفكم أحسن الناس.

تابع قائلا : أهلى حبايبى هتوحشونى كتير وبشكر أهل مدينتى بيلا .. وبشكركم وبشكر أصحابى واخواتى إللى واقفين فى ضهرى بجد انتوا أحسن حاجة فى حياتى .. وربنا يخليكم ليا يا رب .. وبشكر الشعب المصري .. ربنا يخليكم ليا .. السلام عليكم.

الجدير بالذكر أن اللاعب أحمد فؤاد بغدودة اختفى فى 20 مايو الماضى .. عقب تتويجه بالميدالية الفضية وزن 63 كيلو والمركز الثانى بالبطولة الأفريقية بتونس .. خلال الفترة من 15 وحتى 21 مايو الماضي .. وغادر إلى فرنسا دون علم الاتحاد المصرى للمصارعة الرومانية.

فور علم الرئيس السيسي بذلك دعاه للعودة إلى أم الدنيا مصر .. وكلف الأكاديمية الوطنية للتدريب باستقبال اللاعب ومنحه دورة تدريبية في فنون المصارعة الرومانية.