مصر البلد الاخبارية
جريدة - راديو - تليفزيون
آخر الأخبار
ندوة لمجمع البحوث الإسلامية: اليقين أساس الأمن النفسي واستقرار المجتمعات النزول بالحد الأدنى للقبول بالصف الأول الثانوي للعام الدراسي 2025/2026 إلى 240 درجة بعدد من مدارس كف... مدير الإدارة الزراعية بالسنطة: مشاركتنا في الانتخابات واجب وطني زيادة اقبال الناخبين بسوهاج مع قرب انتهاء موعد التصويت مدير تعليم قليوب يتابع سير العملية الانتخابية في أول أيام انتخابات مجلس الشيوخ 2025 وزيرا الشباب والرياضة والأوقاف يتابعان سير العملية الانتخابية من غرفة العمليات المركزية استمرار الثقة في النقيب مصطفى الزعيري ضمن حركة تنقلات الشرطة 2025.. كفاءة تستحق التقدير بمركز إسنا القناة الأولي تنقل انتخابات مجلس الشيوخ عبر 48 نافذة علي شاشتها رئيس البرلمان العربي يلتقي رئيس الهيئة الوطنية للانتخابات، ويشيد بسلاسة سير العملية الانتخابية لمجلس... الحزاوي:المشاركة في الانتخابات ليست مجرد واجب وطني بل رسالة قوية بأن الشعب المصري يتمتع بالوعي والإي...

الأديبة الدكتورة عزة شبل تكتب: حبيبتي يا كورونا

حبيبتي يا كورونا

قصة بقلم/ د. عزة شبل

ياسلاااام ! بقالي في العمارة سنة، أول مرة أمسك ورقة بعشرين، فين الكورونا دي من زمان، ماجتش ليه؟ ربنا يخلي لنا الكورونا، أول حاجة هجيب ربع كفتة من عم إسماعيل اللي على الناصية، دى ريحتها ترد الروح، ياسلام لو يشغلني عنده بدل العمارة اللي أنا طالع نازل امسحها، وكل شوية طلبات من برة، واللي يقولي القوطة مفعصة رجَّعها، واللي يتأمَّر عليَّ ويزعق لو اتأخرت في الطلَبات، وكله كوم والست المجنونة اللي في التالت دي كوم تاني، هرياني مشاوير مش بتجمَّع حاجتها كلها مرة واحدة، نسَّايه، كرهتني في عشتي.

كل ما تفتكر حاجة ماعندهاش غير يا زكي اطلع … يا زكي روح…. يا زكي تعالى… إنما بتاع الكفتة ده ..يا سلاااااام ، أقل ما فيها هايديني صباع كفتة ويمكن صباعين .. وآخدهم وأنا مروَّح للعيال، وأمهم بقى تقولي تعيش وتجيب لنا يا سي زكي، وأنا برضو مش هقطع العشم، وأديني في الرايحة والجاية بوري له نفسي وأسلم عليه، يمكن في يوم يمشِّي الواد الُّلكعي اللي عنده، وساعتها أدخل أنا بقى وتبقى دي فرصتي، ده إحنا هنتنغنغ كفتة، واحتمال يديني ربع فرخة مشوية كمان، ما أنا كل يوم بشوف مع الواد لفِّة كبيرة وهو مروَّح آخر اليوم، أكيد فيها الكفتة والربع فرخة.

والله يا واد يا زكي هتبتدي الدنيا تضحك لك، النهاردة عشرة جنيه الحاجة عنايات خافت تمسكها، أنا شفت وشها وهي مرعوبة من ورا الباب وبتاخد الكيس، وقالت لي الباقي كام؟ طب خده، وخليه عشانك، دي ست جِلدة، عُمْرها ما سابت لي حاجة، مع إن ربنا فاتحها عليها، وابنها الظابط بسم الله ما شاء الله عقبال ما أشوف ابني ياسين مش حارمها من حاجة أبدًا، كل أسبوع يجيب لها حاجات، وسطي بينقطم في تطليعها إشي فاكهة، وإشى خضار، وإشي كياس وإشي علب يَامَا.

يا سلااااااام .. هحط العشرة جنيه بتاعة الحاجة عنايات على الخمسة جنيه بتاعة الدكتور محمد، على العشرة التانية بتاعة الأستاذ عمر، وأجيب ربع كيلو كفتة، وأخليه يحط معاها بقى سلطة كتير، ده عليه حبة مية سلطة مشطشطة.. الفول الصبح ما يحلاش إلا بيها.

وكده بقى معايا 500 جنيه تحويشة التلت شهور اللى فاتوا، وأنا هشد حيلي شوية، وهزودهم كمان، ما أنا في الطالعة والنازلة بقوم بالواجب، وانقل لهم كل الأخبار الوحشة، عشان يترعبوا اكتر، وما يرضوش ياخدوا مني الباقي، طول عمرهم إيحه، ولا شفت منهم أبيض ولا أسود من يوم ما مسكت العمارة، النهاردة هطلع للست هدى دي بقالها شهور ما نزلتش الشارع.

قد يهمك ايضاً:

عاصي الحلاني يطرح اغنيته الجديدة ” قلبي شاطر “

طارق النهري وأميرة فتحي يتألقان في مؤتمر السلام الدولي

– أيوه يا زكي جبت الحاجة؟

– طيب حطها عندك قدام الباب وأنا هبقي آخدها

– شكرًا يا زكي

– العفو يا ست..

– حضرتك سمعتِ آخر الأخبار، بيقولوا إن العمارة اللي فيها بتاع الفراخ اللي في الشارع اللي ورانا جت الصحة امبارح وأخدوا كل سكانها في العزل، وفضَّوها كلها والعياذ بالله، ورشوا العمارة كلها، وقفلوها…

– ربنا يسترها عليك وعلينا يا ست، دا الحالات عمَّالة تزيد، وما حدش عارف حاجة، وربنا كريم، والباقي أهو يا ست، تؤمري بأي حاجة تانية، أنا خدَّامك.

– لا شكرًا يا زكي، وخد الباقي عشانك.

500 جنيه يا واد يازكي يا فِتِك، في 3 شهور بس، أمال لو كورونا دي قعدت ييجي سنتين تلاتة كده، هتعمل إيه، المهم دوقتي بقى جيبي عمران، وجايلك يا بت ياهند، ده أنت عليك جوز عيون، يدوخوا بلد، ولا ضحكتك، ومشيتك، حكاااااااية، بس لو ماكنش مهرِك غالي.. آل إيه شبكتي لازم ما تقلش عن 500 جنيه زي زينب أختي، أنا أعرف بيجيبوا الفلوس دى كلها منين، ماهم زي حلاتي، وجوز اُختها بواب برضو، ولا يعني عشان بواب عمارة في التجمع، طالِع فيها، ونِفسه هتتكبر علينا!!

اترك رد