مدعوم من 
إيه يا دنيا
بقلم – الشاعرة منال السويفى:
قد يهمك ايضاً:
ايه يا دنيا مش كفايه
تعبانه فيكى للنهايه
بحرك ليه على طول معكر
والحلو فيكى بقى ممرر
من يوم ماجيتك متحيره
ايامك غريبه ووشوش متغيره
من وقت ما كنت صغيره
شايله جبال هم وشقى
من ظلمك روحى متشققه
والشقى انكتب ع الجبين
ولا تعرف تمحيه كتر السنين
ايه يا دنيا مش كفايه
هفضل كده للنهايه؟
هى ايه بس الحكايه
ليه بس قصدانى انا
طب فرحينى بس سنه
حرمتى عليه الهنا والفرح
كتبتى دموع والم وجرح
شمس الدفى بقت حروق
والقلب فيك اصبح مشنوق
خنقتينى
خلتينى اتمنى افارقك
وادعى ربى كل ليله
انى ابعد عن ظلمك
سهر الاحبه ظلامه خوف
وسلامك بقى ضرب كفوف
ولسه ياما فيكى هشوف
كفايه بقى انا منك مليت
ياريت ما شفتك ولا ليكى جيت
منال السويفى