أنور ابو الخير يكتب : مسرحية المال السياسي عرض مستمر .. والوعود الزائفة

يعني إيه انتخابات ؟؟… وليه هي مهمة وليه ناس بتخطط ليها من سنين فات وبتصرف دم قلبها عليها وتبعزق بالملايين جنيهات وليه الحكومة والأحزاب بيهتموا بيها وبيجتمعوا في السر يقسموا الصفقات كل مجموعة قاعدة بتسن السكاكين لتوزيع التورتة ولهط الكراسي والجاتوهات والغريبة يا أخي بتلاقي أعداء إمبارح حبايب النهاردة وبيظبطوا مع بعض الخطط والتكتيكات وتشوف حبايب إمبارح برضه بقوا زي الديوك مع بعض من كتر المشاكل والخلافات ياترى إيه السبب وليه الحرص الشديد ده على الكرسي وإيه سر الصراعات
كرسي المجلس ده سره باتع بيخلي ناس محمية بالحصانة وناس تبلبع الآه والاهات و يديلك كارت بلانش تتدلع بيه على المسؤولين في كل المصالح بالوزارات وتقدر تخش بصدرك في الحديد بقلب جامد مدام محمي بالحصانة ومتهني بالتشريفات الكرسي ده سحره رهيب وبينقل صاحبه من عربية أجرة لعالم البيزنس والمليونيرات الكرسي ده قيمة وسيما وتخصيص أراضي لك مش من حقك وبيزنس وخد وهات وتقدر تدخل كمان صالات القمار بتاعة السادة السواح والبهوات وتعمل زعيم وتنفش ريشك وكرشك وتقعد محفلط براحتك في الاجتماعات
وتوزع من جيب الحكومة شقق من حق الغلابة وكمان للعمرة والحج تأشيرات وتقدر تجيب موافقة وزير أو مسؤول كبير من غير ماتحتاج واسطة وعمولات وتقدر تصاحب صافينار وفيفى عبده ورحمة وفهد البطل وتتصور كمان معاهم في الأفراح والحفلات

والكرسي ده لو تعرف مقامه حتطير معاه في السما وتبقى أكيد من البشوات حتتفتح لك كل الأبواب مع تعظيم سلام واحترامات
تاخد قروض بالضمان الشخصي من غير أوراق أوضمانات وبعد القروض تعدي وتفوت بالغنيمة ياعيني على بره وتتمتع بفلوسنا في المنتجعات ولو زِهقت من الهروب ووحشك الكرسي ارجع واتصالح مع البنوك حتسقط فوايدك لزوم التسهيلات وممكن كمان ترجع تترشح من تاني وفي دايرة تانية حسب قانون اللي فات مات وممكن تاخد تأشيرة مباني مخالفة وتتصالح مع المحافظة بشوية جنيهات أو موافقات علاجية لعمليات وهمية أو شد وشفط أوسيليكون لزوم البروزات و تأشيرات للحج والعمرة لأهل الدايرة وتروح تبيعها علشان البركات وتهرب من الضرائب وتفوت في الحديد وتتهجم علي من يعرضك من المسؤولين ومعاك تحصينات وتعارض لمصالحك ومصالح ناسك وتهاجم زمايلك وترفع الجزمة شغل قباضيات
شفت الكرسي قد إيه مهم وليه الناس ملهوفة عليه وبتحلم تحقق الأمنيات بالذمة دي ممكن تكون نماذج نختارها لمجلسنا الوقر من غير
ما نفكر ونحسب الحسابات لازم نشارك بصوتنا وبكل قوة علشان نتخلص من الأشكال دي والسلبيات لازم نختار مجلسنا بمنتهى الشفافية بعيد عن المصالح والعصبيات باختصار اللي يمثل الشعب لازم يعبر عن أحلامنا ويكون فوق مستوى الشبهات  .. ولنا ما نشاهده داخل مدينة زفتي بمحافظة الغربية نموذج للمال السياسي المشبوه والتي اصبحت حديث الجميع داخل المدينة الباسله بل في محافظه الغربية وما يحدث من عبث وفوضي سياسيه ، ويروج لها مجموعه الارزقية الافاقون الآكلون علي كل الموائد وهم معروفون بالأسماء ودورهم سينتهي قريبا . فالشعب الزفتاوي واعي جدا ولديه من الإدراك والفهم ما يجعله يتخذ قرار في من يمثله تحت قبةالبرلمان بعيدا عن شلك المنتفعين الذين لا يمثلون إلا انفسهم فقط

بل هذه المشاهد المستقزه كل يوم داخل مدينة زفتي يجعل الجميع بمطالبة الدوله وشئون الاحزاب بالتدخل العاجل ومراجعه هذه الامور حتي يشعر المواطن البسيط بانه غير مسروق بشعارات زائفة من اشخاص ليس لهم تاريخ ولا احد يعرفهم إلا من خلال اللعب علي وتر الغلابه بحفنه جنيهات وكراتين سلع وهو أسلوب رخيص وقديم عفي عليه الزمن .

بلدنا محتاجة دم جديد من النواب النزيهة اللي تخدم أهل دايرتهم وتقدم الخدمات وتراقب الحكومة وتحاسب ضميرها كمان في التشريعات وهو ده اللي بنتمناه من كل واحد بيترشح كنائب قادم وآت
النماذج اللي قلناها دي ممكن تتسرسب جواك وتسرق أحلامك وممكن تسحب بطاقة انتخابك بخفة يد حتى وانت رايح في منامك وحيقولوا للرأي العام ساعتها دي رغبة الجماهير وإن ده أكيد صوتك وكلامك ومش حقولك إيه حيكون مستقبلك ياسواد أيامك وساعتها اوعى تلوم غير نفسك وحتشوف الذل قدامك
خد بالك من صوتك وتعالى نبني بلدنا من جديد ونساعد الشباب والكبير اللي ناوي على التغيير والتجديد
لازم نختار نواب يشرفوناويساعدوا المسؤولين على حصر الفساد بالتحديد
إحنا أصحاب ريادة برلمانية وياريت ترجع أيام
الدكتور صوفي أبو طالب للبرلمان وتعيش الديمقراطية عيد لو عرفنا نختار نوابنا بنزاهة حتتبدل حياتنا أكيد
احترس من المرشحين صدقني قبل ما تخسر نفسك بمنتهى الأسف وأوعى حد فيهم يضحك عليك ويدعي عليك النزاهة والشرف حتلاقيهم بألف وش ولون يعني حاجة في منتهى القرف بيدعوا خوفهم عليك والأمانة وكل واحد فكره مال وانحرف ينشلوا صوتك ويسيبوك قاعد غلبان وهم قاعدين في عز وترف باختصار لو اخترت صح يبقى مستقبل بهية خلاص اتعرف
حاسب من المرشح صاحب الكلام المعسول واللي بيلعب عالطبلة والكمان وبارع في الوعود وضرب العود وبيرقص بالصاجات كمان

الصبح وطني والعصر وفدى وبالليل ياولداه حاجة كده سمك لبن تمر هندي على كل الأشكال والألوان يتكلم بحماس وينافق الناس ويتجمل في كلامه قال يعني جنتلمان يجاملك وينافقك في الحديث وهو جواه منك قرفان يسلم عليك وممكن حتى يبوس ايديك ويجري يغسل ايديه بديتول وبارفان ويسرق صوتك ويهبر الحصانة ويتعشى قروض ويسيبك جعان
صوتك أمانة صدقني حافظ عليه ولو نشلوه مفيش غيرك حيكون ندمان
خلاصة الكلام عزيزي المواطن احترس من المرشحين وخليك صادق مع نفسك واختار صح وخليك مع نفسك أمين فكر في مستقبل بلادك وولادك فكر في حلم الملايين بلادنا لازم تتغير والبداية تعرف صوتك رايح لمين
اعمل اللي عليك وارمي الكورة في ملعب اللي علينا مسؤولين وأصرخ ساعتها إحنا اخترنا صح يا ترى حتتغيروا انتم كمان وللا على إيه ناويين ياترى حكومتنا ساعتها حتتغير وللا حنقول جبتك ياعبد المعين
المهم سيبك من كلام المقالات وروح كنترول الحزب إياه حتعرف اللي حينجح في الانتخابات مينى هم قالوا فيه تغيير بس ياخسارة ما قالوش سنة كام وألفين المهم تغيير المواطن وربنا يثبت كراسي السادة النواب والمسؤولين ويحكموا ولادنا وكمان أحفادنا ادعي معايا وقول آمييييين بلا انتخابات بلا وجع دماغ يا ترى الحكومة في العيد اللي جاي هنفطر بمين