متقارنش نفسك بحد

بقلم – إسراء السيد سالم.. المحاميه

كل واحد رزقه مكتوبله. و كل واحد مشوار حياته مختلف عن الي حواليه.

المقارنة اتعودنا عليها من صغرنا لان اهالينا دايما بيقولولنا نبص علي سلوك اولاد خالاتنا او اولاد عمامنا او اخواتنا و يقارنونا بيهم عشان فاكرين ان ده هيدينا دافع نبقي احسن او نذاكر اكتر او نبقي ناجحين اكتر.

فا موضوع المقارنة ده بيترسخ في ادمغتنا.

متعملش كده في نفسك.

المقارنة الوحيدة الي لازم تعملها هي مقارنة نفسك بنفسك امبارح و اليوم الي قبله و السنه الي فاتت. شوف انت اتحسنت في ايه و بقيت اوحش في ايه و اشتغل علي نفسك لنفسك. بس المقارنة بالغير مش هتعمل حاجه غير انها هتتعبك نفسياً و ممكن جداً توصلك لفقدان الامل بدري بدري عشان مش عارف ازاي توصل للي وصلّه حد تاني.

قرارك انك هتشتغل علي نفسك و تحسن من نفسك لنفسك ده لوحده ممكن يوديك في حته احسن و ابعد بكتيير من فكرة انك تقارن نفسك بأي حد تاني.