تعالي أقوللك على حاجة

بقلم/ عزة البرقاوي

انتى تعرفى انك انسانه رقيقه جدا ؟ طيب تعرفى ان بداخلك حنيه وطيبه تكفى اسرتك ومن حولك ؟وتعرفى ان رسول الله صلى الله عليه وسلم وصى عليكى استوصوا بالنساء  خيرا .

    تعالى اقولك على حاجه

تعرفى ان رب العالمين انعم عليكى بنعم كثيره جدا منها  الرقه والانوثه، والحنان ،وطيبة القلب بالفطرة  …  حابه تكونى انتى الامن والامان والسكن والسكينه ؟ علشان تكونى كل اللى فات لازم  يكون عندك  رضا وقناعه بما قسمه  رب العالمين.

 

تعرفى انك لما تقولى الحمد لله ربنا بيزيدك من هذا النعيم فيقول رب العزه وإن شكرتم لازيدنكم فالحمد لله على كل ما نحن فيه …طيب ليه بعد الزواج نندب ونشتكى للى حصلنا ؟ ، وخصوصا بعد الحمل وانجاب الاطفال تقعد تستعيد الذكريات مع صديقاتها لما كانت ورده ورشيقه ونشيطه وشعرها تقيل وجميل و.و.و….وبتبقى شايفه الدنيا مظلمه وصعب إنها ترجع اللى فات .

تعالى اقولك على حاجه

الحقيقه احنا كستات اللى عملنا فى نفسنا كدا من خلال اسلوب حياتنا اللى بيكون هو السبب فى التدهور دا .حضرتك بتيجى دائما على نفسك وبتأخرى احتياجاتك علشان الاسرة ودا كويس ولكن .لا يجب ان يكون هذا هو إسلوب حياتك الدائم لازم يبقى ليكى نصيب ولو جزء من وقتك للراحه والاسترخاء لكى تستطيعى انك تستكملى لان مهم جدا انك تكملى فكثيرا من النساء يقومن بذلك  بيهتموا بأكلهم ومظهرهم فلما تنتظرن بعد ان تصغر ملابسك وبعد ان يزيد وزنك ويبدأ زوجك بالتعليق فتكون الصدمه !

فكل زوج يريد زوجته جميله ومهندمة ومنظمة ومثقفه بجانب كله بيته واولاده فلا تنسي عزيزتى أن الجهد الاساسى هو لبيتك وأسرتك   فانتبهى  لنفسك وبيتك قبل فوات الاوان .

تعالى أقولك على حاجه .

عارفه فى حاجات بسيطه لو اتعودتى عليها هتغيرلك حياتك للافضل اتعودى لما تحسي بالاشتياق لزوجك اتصلى وكلميه وعرفيه انه وحشك وسمعيه كلمة حلوه اسمعيه اعرفى طبيعة شغله ونظامه علشان تلتمسى الاعزار لو اتأخر  ، اجبريه يسمعك ويفهم طبيعتك  هتفرق  معاه ومعاكى جدا .

اخرجى انتى واسرتك ولو مره فى الشهر اكسرى الروتين هتفرق معاكى ومع اسرتك كتير ، مهما كبر ابنك او بنتك احضنيهم وبوسيهم وقوللهم دعوه حلوه هتفرق معاهم نفسيا جدا ، روحى للكوافير ولو مره فى الشهر هتفرق معاكى نفسيا ، غيرى نظام بيتك كل فتره نوع من التغيير .

كثيرا من السيدات  يعتمدن على ازواجهن اعتمادا كليا وده هياثر على شخصيتك مش هتعرفى تاخدى قرار او تتصرفى لو اتعرضتى لموقف لوحدك وعلشان تتفادى دا ركزى دايما فى الحلول وشوفى زوجك لو مكانك هيتصرف ازاى واسألى عن أى حاجه مش واضحه بالنسبه لك بحيث انك لو اتعرضتى لموقف تعرف تتصرفى التصرف الصح . حسسى زوجك باحتياجك ليه حسسيه بضعفك فى بعض المواقف الراجل بيحب كدا ، وحبى اهل زوجك وحماتك مثل اهللك هيحب دا فيكى وهيحب اهلك اصلها علاقات حب متبادله   طيب تعالى اقولك على حاجه.. تعرفى ان الانثى تعرف دائما ببصمتها : عادة فعادة المكان الذى تعيش فيه الانثى يكون أكثر إشراقا وبهجه من المكان الخالى منها .

تعالى أقولك على حاجه

هلى تعلمى  أن جميع من حولك ينتظرك ؟، ينتظر ليرى لمستك الانثويه وبصمتك الرقيقه فى كل مكان مررتى به سواء كنت فتاه صغيره فى بيت اهلك  أو إمرأه متزوجه فى بيت زوجك فالجميع يتشوق ليرى دائما أثر مرورك فى حياتهم …فلا تذوبى فى حياة من حولك حتى تختفى تفاصيلك الرقيقه ، ولا  تندمجى فى مشاكلهم وتنسى نفسك إجعلى من بيتك الهدوء والسكينه فانتى اساس هذا المنزل

 

…..فتحياتى لكل النساء…