لعلنا نجد نقطة إلتقاء !!!

بقلم – أماني النجار:

هما كانو بيحبوا بعض ؟؟؟؟

هما كانو واخدين بعض عن حب ولا تخليص حق ؟؟؟

هي العلاقة اللي بينهم كانت حب ولا مصلحه ؟؟؟

وكم من الاسئلة اللي من النوع ده اللي بنسألها أول مانسمع فلان وفلانه اللي من عيلتنا أو من شلتنا أو من دايرتنا القريبة انفصلوا أو بينهم مشاكل حتؤدي في النهاية للانفصال

بنسأل كم الأسئلة دي ونتصعب على حالهم ، لكن بسرعة بننسى وبنكمل في حياتنا والمشهد ده بيتكرر تاني فنسأل تاني وننسى تاني وتفضل الدايرة تضيق يوم بعد يوم لغاية مايجي الدور علينا

ساعتها بس مش بنقدر  نتصعب  ونمشي ولا حتى بنقدر نكمل وننسى

لكن بنسأل نفسنا نفس الأسئلة اللي كنا بنسألها  بس مع تبديل الضمائر من هما كانوا لهو احنا كنا …؟؟؟

وبنبدأ نفكر التفكير اللي لو كنا فكرناه مع كل قصة كنا بنسمعها يمكن كنا وصلنا لنقطة إلتقاء .

أول سؤال طبيعي هو احنا كنا بنحب بعض ؟؟؟؟

وبنرد على حالنا ايوه طبعًا ده أنا فضلته على كل شباب الكرة الارضية وقتها ،، طيب وهو بالنسبة ليه ايه؟؟؟؟

هو …ده فضلني على بنت طنط دولت وبنت طنط حشمت وكل بنات طنطات العيلة ،، جميل طيب وبعدين ؟؟؟؟؟؟؟

وطبعاً الأسئلة دي بنسألها لنفسنا ولسان حالنا هو اللي بيجاوب .

مشكلتنا اننا بنتخيل اننا طالما احنا الأتنين حبينا بعض يبقى احنا الاتنين لازم نكون زي بعض في كل حاجه ،،،،وبنرفض من جوانا فقه الاختلاف اللي هو أصلا من السنن الكونية فالاختلاف بين البشر حقيقة لا يمكن انكارها ومش حتتغير  إلى أن يرث الله الأرض ومن عليها ، بالرغم من اننا لو فكرنا شويه كنا حنتأكد من كده .

وطالما اننا مختلفين كشخصين من ناحيه التكوين لكن متفقين من حيث المبدأ اننا نكمل مع بعض فلازم تحبني بالطريقة اللي بتتناسب مع شخصيتي من ناحية وكوني ست من ناحيه تانيه طالما انها مش بتقل منك كراجل ، انت كمان من حقك نفس الشيء لكن المشكلة بتحصل لما تعاملني بطبيعتك انت وتستنى مني اني اعاملك برضو باللي يناسبك انت .

يا سيدي الفاضل مادمنا احنا الاتنين مختلفين من حيث التكوين اللي ربنا خلقنا عليه فمن الطبيعي والمقبول  إن الطريقة اللي ممكن تسعدني تكون مش نفس الطريقة اللي انت متوقعها أو اللي بتسعدك إنت ، وعلى فكره انا قولت الطبيعة اللي ربنا خلق كل واحد عليها لاننا ممكن نكون أخوات بيجمع بينا الأم والأب كعامل مشترك ومع ذلك اللي يسعدني ويفرحني مختلف تماماًعن اللي يفرح أخويا أو أختي .

وعليه  فلازم اعرف طبيعة اللي قصادي علشان اوصل للي حيسعده

فالشخص اللي بيحب الحب اللي مليان كلام هادي ورومانسي  مش حيسعده الحب الصامت حتى  لو كانت نيه الطرف الصامت كلها حب ، واللي بتسعده الطبطبة مش حيكون سعيد لو حبك كلام وبس ، وهكذا …. حتلاقي اللي تملك قلبه بكلمه واللي تملك قلبه بفعل ، وتلاقي اللي سعادته في مكالمه وعلى العكس في اللي سعادته مجرد مسدج بس يحسه،  كل واحد فينا ليه شفره في الحب ، باسورد لو مش معاك صدقني العلاقة حتبقى مجرد وقت وحتنتهي ، والانتهاء هنا ممكن يكون بالبعد الحقيقي المادي الملموس او بالبعد المعنوي وده اللي بيسموه الانفصال الصامت وللعلم ده  أسوء أنواع الإنفصال واشدهم عذاباً.

انت ممكن تحس إن كلامي صعب التنفيذ ومحتاج طاقةومجهود علشان يتنفذ ، بس حقيقي الطاقة اللي حتبذلها  وانت بتحاول تفهم اللي بيحبك  محتاج منك ايه علشان تسعده ابسط واهون بكتير من الطاقه اللي حتهدرها وانت بتقاوح علشان تنجح علاقه من وجهه نظرك انت بس وبالطريقة اللي انت شايفها بس من غير ما تفكر في الطرف التاني وجهه نظره ايه او بيحب ايه ، فرق كبير بين انك بتحببني فيك وبين انك بتروضني .

لازم تفهم كويس انك تحب فده مش إعجاز علمي و اي حد يقدر عليه ، لكن انك تحافظ على الحب ده فدي مسؤلية مش اي حد يقدر يتحملها .

ففي فيلم هيبتا اللي كتير من الناس مش بتحبه او بتفهمه في جمله حلوه اووي  بيقولها ماجد الكدواني في أخر الفيلم لخصت كل اللي انا قولته ده (كلنا عايزين نحب ..كلنا ممكن نحب …كلنا نقدر نحب بس لازم نبقى فاهمين كويس ان ثمن الحب ده حيتقسط على دقيقة في عمرنا …….الحب الكامل لو لدقيقة واحده بس هو اللي بيحسسنا في لحظه النهاية أد ايه كانت الحياة حلوة بجد تخيلوا بقى لو نقدر نحافظ على الحب ده لأكتر من دقيقة…….!!!)

لما ربنا يُنعم علينا بقلب بيحبنا بجد لازم نحافظ على النعمة دي وبدل ما نهدر طاقتنا في الخلافات والنقد ومحاولة الانتصار للنفس وتبرئة الذات ، نحاول نفكر هل كل واحد فينا كان اد المسؤلية وسدد اللي عليه من تمن الحب ده علشان نقدر نكمل ولا تخازل ورمى الحمل كله على التاني ؟؟!!!

يمكن لو قدرنا نقف ونجاوب على السؤال ده وقتها بس نلاقي بينا  نقطة إلتقاء ..