قصيدة “عايزني أرجع” للشاعر السكندري عثمان بحور

قصيدة. “عايزِنِّى أرجع”

شعر عثمان بحور .الإسكندربة

عايزِنَّى أرجع ليه
للى ظلمنى ليهواللى رمانى وباعنى
وراح لغيرى ليه !
عايزنِّى أبقى بهيمة
وأرجع أبوس رجليه
لأنى واحدة يتيمة
ودراعى تانى يلوِيه
كفايا قلة قيمة
ملعون أبوك يا جنيه
عايزِنَّى أرجع ليه
للى ظلمنى ليه
شوفت معاه أنا إيه
يجعلنى أبقِى عليه
دنا عمرى اللى راح
بأتحسَّر عليه
ومكان الجراح
بيفكرنى بيه
عايزِنَّى أرجع ليه
للى ظلمنى ليه
وحياة كل غالى
أنا بعته عليه
وخيانة فؤادى
والزايغة عنيه
وصرخة ولادى
وشَعرى فى إيديه
وكلمة جيرانى
أنتى قاعدة ليه !؟
مش هأرجعله تانى
لو كتبلى إيه
عايزنِّى أرجع ليه
للى ظلمنى ليه
عايزنِّى أرجع جارية
يضربنى وأداديه
وأبقَى القطة العامية
وأتحمل بلاويه
بعد ما جات لى الفرصة
من قلبى إن أرميه
زى ما هُوِّ رمانى
زى ما هُنت عليه
وأخيرًا دا قرارى
ونا مش هأرجع فيه
عايزنى أرجع ليه
للى ظلمنى ليه.
كلمات الشاعرعثمان بحور.الاسكندرية