شعر امال محمود : من ديوان شيء وضده

( صورة معكوسة )

على حسنها على طول محسوده
دايما بالأحزان موعودة
شجرة توت بعد أما شافتكو
ولا طرحِت حبّاية توتة!!
بيقولوا ولا شايله في راسها
م الأحزان حتى الفتفوتة
لو بصيتوا على مرايتها
حتلاقوا الصورة معكوسة
لو ركزتوا ورا ضحكتها
هتلاقوا الدمعة محبوسة
فرسة وجواها مكسور
وسط العتمة تبيّن نور

واقفة وصامدة ولا بتبيّن
وكأن اللي مابيها هيّن
دي حصان متأصل وأصيل
عدى صعاب مشوارها طويل
يجري ويرمح صبح وليل
ويشيل هم يهد الحيل
وآدي الوردة اللي حسدتوها
حبيتكم وانتوا كرهتوها
حتى حياتها استكترتوها
بشرار عينكم ضيعتوها
بصّوا لأصل صورتها تلاقوا
لو نطقت هتقول: فارقوها!